ညအချိန်မတော် တက္ကစီ စီးတဲ့အခါ အလုံခြုံဆုံး ဖြစ်စေမယ့်နည်းလမ်း(၃)ခု

ညသန်းခေါင်ကျော်လောက်ကြီး တစ်ယောက်တည်း အိမ်ပြန်ခဲ့ရတာတွေ ရှိခဲ့ဖူးမှာပါ။ ခရီးကနေ ပြန်လာလို့ပဲဖြစ်ဖြစ်၊ သူငယ်ချငးတွေနဲ့အပျော်လွန်ပြီးနောက်ကျသွားတာပဲဖြစ်ဖြစ် ညအချိန်မတော် တက္ကစီနဲ့ အိမ်ပြန်ဖူးကြပါလိမ့်မယ်။

အဲဒီအချိန်ကြီးမှာ ကိုယ်က တစ်ယောက်တည်း တက္ကစီ စီးနေရပေမယ့် ဆိုးသွမ်းတဲ့တက္ကစီသမားတစ်ယောက်ယောက်နဲ့များတွေ့ပြီး ပိုက်ဆံပဲအလုခံရမလား၊ ကိုယ့်ဆီမှာရှိတာတွေ ယူထားလိုက်ပြီးကားပေါ်ကနေ ကန်ချထားခဲ့မလား ဆိုတာ စိတ်ထဲမှာ ခဏတော့ တွေးမိကြမှာပါ။

တချို့တက္ကစီသမားတွေက လူကောင်းတွေဖြစ်ပြီး စောင့်ရှောက်တတ်သူတွေဖြစ်ပေမယ့် တချို့ကတော့ အခွင့်အရေးယူသူတွေ ဖြစ်နိုင်ပါတယ်။ ဒီတော့ ညအချိန်မတော်ကြီး တက္ကစီ စီးဖို့ ဖြစ်လာတဲ့အခါ ဒီနည်းလမ်း(၃)ခုကိုသာ သုံးကြည့်ပါ။ သင် အိမ်ကို အလုံခြုံဆုံး ပြန်ရောက်သွားပါလိမ့်မယ်နော်။

(၁) ကားထဲမှာ အခြားလူတစ်ယောက် ပါ/မပါ အရင်ကြည့်ပါ..

သင်စီးမယ့်ကားထဲမှာ ကားမောင်းသူအပြင် အခြားတစ်ယောက် ရှိနေမယ်ဆိုရင် အဲဒီကားကို လုံးဝမစီးတာအကောင်းဆုံးပါ။ တကယ်လို့ လမ်းမှာတစ်စုံတစ်ခု အမှားအယွင်းရှိခဲ့ရင်တောင် တစ်ဦးချင်းရင်ဆိုင်ရတာက သင့်အတွက် ပိုကောင်းမှာပါ။

ကားမောင်းသူနဲ့အတူ နောက်တစ်ယောက် အတူရှိနေတာမျိုးက သင့်ရဲ့စိုးရိမ်မှုကို တစ်ချိန်လုံးတွန်းအားပေးနေသလို ဖြစ်နေမှာမို့ တစ်ဦးထက်ပိုပြီး ကားပေါ်မှာရှိနေခဲ့ရင် နောက်တစ်စီးငှားလိုက်တာက အကောင်းဆုံးပါပဲ။

(၂) ကားပေါ်တက်တာနဲ့ဖုန်းဆက်ပါ..

ကားပေါ်တက်လိုက်ပြီဆိုတာနဲ့ သင့်ရဲ့မိသားစုဝင်တစ်ယောက်ယောက်၊ ဒါမှမဟုတ် သင့်ရဲ့သူငယ်ချင်းတစ်ယောက်ယောက်ဆီ ဖုန်းဆက်ပြီး သင်ဘယ်နေရာကနေ ကားငှားလာပြီဆိုတဲ့အကြောင်း အသိပေးပါ။

ဒီလိုအသိပေးခြင်းက သင့်ရဲ့အိမ်အပြန်ကိုစောင့်နေတဲ့သူတစ်ယောက် ရှိနေတယ်လို့ ဖော်ပြလိုက်တာပဲဖြစ်ပြီး လမ်းမှာ တစ်စုံတစ်ခုဖြစ်ခဲ့ရင် ကူညီမယ့်သူတစ်ယောက် အဆင်သင့်ရှိနေတယ်လို့ ဖော်ပြလိုက်တာလည်းဖြစ်ပါတယ်။

ကားငှားပြီဆိုတာနဲ့ ကားနံပတ်ကို အရင်မှတ်ထားပြီး မိသားစုဆီ၊ ဒါမှမဟုတ် သူငယ်ချင်းတွေဆီ မက်ဆေ့ခ်ျပို့ဖို့ မမေ့ပါနဲ့။ ဒီနည်းက သင်တစ်ခုခုဖြစ်ခဲ့တယ်ဆိုရင်တောင် သင့်အတွက် အထောက်အကူဖြစ်မှာဖြစ်ပြီး ဒီကားနံပတ်ကတစ်ဆင့် ပြန်လည်စုံစမ်းလို့ရပါလိမ့်မယ်။

(၃) အငှားဝန်ဆောင်မှုကုမ္ပဏီတွေကိုသုံးပါ..

ဒီနေ့ခေတ် ရန်ကုန်မှာတော့ ကားအငှားဝန်ဆောင်မှုတွေများလာကြပါပြီ။ ကိုယ်သွားချင်တဲ့ခရီးကို App မှာ ရိုက်ထည့်လိုက်ပြီး ခလုတ်နှိပ်လိုက်ရုံနဲ့ ကားတစ်စီးက သင့်ဆီကို အဆင်သင့်ရောက်လာနိုင်တာမျိုးပါ။

ဒီတော့ ညသန်းခေါင်မှာ တစ်နေရာရာသွားဖို့လိုလာပြီဖြစ်ရင် တရားဝင် ကားအငှားဝန်ဆောင်မှုတွေကို သုံးတာအကောင်းဆုံးပါပဲ။ သူတို့ဆီမှာ သက်ဆိုင်ရာ ကားသမားတွေရဲ့ ကိုယ်ရေးအချက်အလက်တွေကို မှတ်ပုံတင်ထားပြီးသား ဖြစ်တာမို့ သင့်အတွက် အလုံခြုံဆုံးဖြစ်မှာပါ။
__________________________
Credit : santhitsa